Rusiya tərəfinin bəyanatında qeyd olunur ki, Suriyada vəziyyətin sabitləşdirilməsində inklüzivliyin təmin edilməsinin vacibliyi vurğulanıb. Lavrov və Fidan arasında telefon danışığı Rusiya xarici işlər nazirinin müavini Mixail Boqdanovun Suriyaya son səfəri və Suriya xarici işlər naziri ilə görüşü fonunda xüsusilə diqqəti çəkir.

Suriya hökumətinin həmin görüşlə bağlı yaydığı bəyanatda Rusiyaya Bəşər Əsədin təhvil verilməsi tələbinin təqdim edildiyi və Rusiyanın Suriya ictimaiyyətinin verdiyi itkiləri ödəməli olduğu bildirilir. Əslində belə bir təəssürat yaranır ki, Dəməşq bu şərtlər daxilində yalnız Hmeymim və Tartus hərbi bazalarını saxlamaq imkanını görür. Moskva Türkiyənin Suriya hökumətinin ağzından danışdığına inanırmı?

Əgər belədirsə, Rusiya Türkiyədən Dəməşqi cilovlamağı tələb edəcək, yoxsa Suriyadakı hərbi bazalarını saxlamaq müqabilində sadəcə olaraq razılığa gəlməyə və Ankaraya sövdələşmə təklif etməyə çalışacaq? Yoxsa Moskva da öz növbəsində Ankara ilə sərt danışa və Rusiyanın Suriyadakı maraqlarını nəzərə almamağın yeni hökumət üçün ciddi problemlərə səbəb ola biləcəyi ilə hədələyə bilər?

Moskva “Əsəd kartı”nı yenidən işə salmaq, Suriyada həm YPG seqmenti ilə əlaqələr, həm də hələ hökumətin nəzarətinə keçməmiş bir sıra silahlı birləşmələr formasında oynamaq imkanlarını özündə saxlayır.

Bir şey dəqiqdir ki, Moskva ilə Ankara arasında Suriya məsələsi ilə bağlı bəlkə də kifayət qədər mürəkkəb danışıq var və təbii olaraq bu söhbətin öz mürəkkəbliyi ilə Qafqaza yayılma riski mövcuddur. Onu da qeyd edək ki, bu “səbəb-nəticə” əlaqəsi yalnız Suriya ilə məhdudlaşmır, Ukraynadan Tayvana qədər uzanan böhranlarda özünü daim göstərir.

Asif Cəfərov
Ordu.az